"廈門之旅"變左"香港機場之旅"

 

我同亨利原本上星期五 (即係九號風球) 朝早坐CX飛去廈門; 不過, 最後竟然變成 "香港機場之旅"...

 

晨早六點起身仲起三號波波, 睇埋 NOW TV 既 flight 又無話取消, 果陣時真係超開心梳洗準備出門口...

 

同亨利去到機場 (雖然剛掛左八號波波), 好順利 check-in 埋 , 食埋早餐就等上機...

 

九點二十五分上到機, 我同亨利都好期待起飛既一刻; captain 仲講下歡迎辭同天氣...  點知人算不如天算, 前後唔夠十五分鐘, captain 就話天氣突變, 風力超出安全標準, 決定 "取消" 此航班!!!!! 嘩!!! 我同亨利當堂呆左!!!!!

 

不過, CX應變真係超快!!! (要俾五個叻) 坐左一陣, 空姐即派每人一份簡單既小型三文治同果汁; 跟住 captain 就話立即安排大家入住富豪機場酒店..... OH! 大家都開心到笑 (無奈的笑~~ 但又好過無!)

 

CX好豪, 除左俾我地即刻入住酒店, 仲每人俾左 HK$440 coupons 我地食早, 午, 晚三餐時用架!!! 

 

就係因為依班 flight cancel 左, 我地既 "香港機場之旅" 就因此而開始啦...

 

 

       

 

        

        * 八號風球下的天氣...