依幾日天氣熱到差D中暑, 所以出街多數等到好晏先至行動, 費事熱壞人...
雖然屋企樓下有好多食肆, 但今日我都寧願留係屋企整野食...
而今日既我同亨利既 Sunday Brunch 就係:
香煎薯餅 + 粒粒豆腐粟米湯
* 先有免治牛肉... (用基本野醃二十分鐘)
* 小薯仔六個 (二人份量)
* (上下) 將洋蔥切成粒粒狀
* 跟住煲淋薯仔後再壓成蓉...
* 再將醃好既牛肉同洋蔥加入薯蓉內搞好
* 用小小保鮮紙包起適當份量, 然後壓平... 跟住就可以用中細火煎架啦!
* Yeah, 食得啦... 勁香又有益!!! 亨利都讚好味呀!!!
* 仲有整埋超滑豆腐粒粒粟米湯...
* 食完真係好滿足喔...
亨利無啦啦咳左兩日; 雖然睇左西醫, 但一食左咳水, 就會人都頹晒, 要即刻訓覺...
見到佢咁辛苦, 我上網學下煲乜湯水飲好...
我咁大個女第一次去買海底椰, 無花果同埋川貝; 嘩, 原來依D材料都幾貴架... 川貝仲要成一百蚊一両呀!!!
不過, 唔緊要啦... 我只希望亨利快D好番咋!
* 依D就係無花果, 海底椰, 同埋細細包又係最貴既川貝啦...
* 南杏北杏
* 果皮要先浸軟
* 十蚊豬展洗淨
* 全部野煲一個鐘就飲得... 蘋果唔駛太早放, 煲左30分鐘左右先放蘋果會最好!
(因為太好味, 依張湯飲左一半先記得影相呀, hahaaa... )
同亨利行完 MegaBox, 佢話不如去(就黎拆既)牛頭角下邨喎...
好呀! 我地仲順便食左少少野, 感覺好平民化呀!
* 有皮蛋瘦肉粥, 豬潤腸粉, 同埋淨魚皮鮫... 都幾好味喎!
* 前面仲有好多打冷店, 仲坐滿人... 不過我地無影到呀...
* 好耐都無行依D士多啦...
* 有少少鬼秘喔...
亨利無啦啦話要去拎相!!! 下, 我諗黎諗去都唔知有咩相要拎喎???
哦...... 原來係年頭去馬交影落既相... 哎呀, 家下先晒好呀...
不過, 今次亨利影得好有feel; 加埋E沖C既效果晒出黎, 顏色真係好特別呀!!!
* 因為拉菲林既問題, 晒出黎就會將幾張相疊住左.... 好特別呀!!!
* 景象重疊晒啦, hahaa...
* 亨利影塊鏡, 反影出來既效果原來會咁靚...
亨利好即興, 無啦啦話不如夜晚等佢整越南檬喎... 好提議! 就等我睇下好唔好食先...
其實依一餐真係好容易整, 不過準備既功夫就唔少啦!!!
材料包括有花生, 芽菜, 牛柳, 洋蔥, 米粉 (搵唔到檬粉, 所以用米粉代替), 蔥粒, 檸檬, 魚露, 糖...
1/ 先將牛柳薄切, 然後用基本野醃十五分鐘左右, 一陣連洋蔥一齊炒
2/ 洗淨芽菜, 用熱水滾一滾
3/ 煮米粉, 但記得煮好後即用凍水過冷河 (效果會超爽)
4/ 花生要壓成碎粒
5/ 將魚露加少少糖同檸檬汁 => 成為 "碌冧", 自己慢慢調味 (鍾意辣可加切左粒既紅辣椒一齊撈)
6/ 爆油放入蔥粒略炒
整好晒就可以續樣撈黎食啦!!!
亨利仲話如果加埋切左粒既油炸鬼一齊食, 會仲好食架喎!
By the way, 依一餐好好味呀!! 多謝亨利!!!
* 細個聽得多既 "超力~力~力" 米粉, 原來係咁好食架喎...
* 中間係亨利壓碎左既花生...
* 亨利話要多汁喎, 可以用埋D汁撈粉食好味D... 所以我加多左水同鼓油煮...
* "撈米" 四步曲... (by 亨利)
* 加埋個自製碌冧, 就可以食得啦.... Yeah!
* 仲有煮左幾隻雞翼做小食...
* 最後梗係唔少得我煲既花膠湯啦...
