HAPPY 2009

陳生陳太祝各位: 新年快樂, 開開心心, 幸幸福福, 健健康康!!!

你地睇, D相係亨利老公係屋企窗前影架!!!



     

     

     

         

     

                          YEAH!!!!! HAPPY NEW YEAR!!!

亨利老公煮的西餐

亨利老公尋晚煮左一餐晚飯我食, 味道雖然一般; 不過好開心我一放工就有得食啦, 因為亨利老公尋日放假...

有露荀白汁意粉, 牛扒同雞蓉雜菜湯...   最後仲有黑芝麻奶凍呀!!!



      

      

       

      

       

      

       * 不過之後我就慘啦... 個傻佬搞到個廚房污糟晒... 我洗左好耐呢!

親自下煮的第一餐

尋日正式煮左一餐晚飯俾我個亨利老公食, 真係好開心呀!!!

雖然都整左成個鐘頭, 但一諗起佢一放工 (尋日佢都要返工) 就有得食, 感覺 (好似) 好鬼溫馨呀!!!

簡單的有蒸排骨及炒青紅椒加洋蔥同秀珍菇… 乜半米全部食晒, 呵呵呵…

亨利老公話今晚想食西餐喎, 仲要爭住佢煮添, hehee…

Well, 唔知佢煮乜呢???



        

        

        

        

        

         * 晚上既新居原來可以咁 warm 架...

陳太的(忙碌)生活

時間過得超快...  唔經唔覺, 我就快做左陳太一個星期啦...

果日結婚既興奮, 至今仍非常難忘; 真係要好多謝身邊既兄弟同姊妹, 令我同亨利老公有一個勁開心又難忘既婚禮, 好多謝晒你地呀!!! 有你地依班好兄弟同好姊妹, 我地真係“C”而無憾!!!!!

依幾日, 我都係向新居執屋執屋再執屋. 用左一日時間去娘家執野, 跟住又用左一日向新居執野; 嘩, 真係累死囉!  不過, 好彩都無減我同亨利老公既心情去迎接依個特別既聖誕節...

由於亨利老公個姨媽上幾星期由法國飛黎香港參加我地既婚禮; 而佢又要向聖誕節正日飛返法國, 所以我同亨利老公都去左送佢機呀!!!

尋日 Boxing Day, 我同亨利老公就去左住一晚酒樓送既紅磡都會海逸酒店 hea 下同休息下...

好啦, 聽日唔可以再出街食飯啦; 等我煮番一餐好野俾個亨利老公食先!!



      

     

      * 亨利老公於晚宴時送給我既玫瑰呀!!! (全部一共有99支呀)



     

     

     

     

     

     * 好鬼熱情既亨利老公姨媽...



     

      * 我地依幾日既戰利品呀!  癲到好似去左旅行買手信咁呀! hehee...



     

      * 酒店房外的景...

聽日結婚啦...

         

多謝酒樓送左依個賀稿俾我同亨利, 聽日將我地既大日子消息刊登東方日報, 話俾全香港人知, 一齊分享我地既喜悅, yeah!!!

P.S. 各位好朋友, 聽日見啦, 錫晒你地呀!!!

                        

好開心呀!!!

 

尋日終於係我返左依份新工既第三個月, 時間真係過得好快呀!!!

除此之外, 亦都係我返埋依日就放七日婚假; 所以我攞左三打西餅請D同事食...

好開心呀!!! 朝早開會既時候, 老細俾左少少時間我同D同事講左D深情對話... 除左多謝佢地依三個月黎既指教外, 就係同大家講我既喜訊; 最重要係同大家講因為我唔想打搞大家, 所以無請到大家去飲, 希望佢地唔好介意啦...

之後, 最開心係收到佢地一份好大既心意; 就係一張簽晒名既卡同幾張百老匯禮券呀!!! 

P.S.  依一日係我返咁多日工以黎最開心既一日, 希望以後日日都咁開心就好啦...

         

        

        

 

唔好咁凍呀!!!

仲有五日就係大日子啦...

今日上網睇下天氣報告先, 嘩, 唔係呱, 無啦啦都要跌多幾度, 想凍C人咩!!!!!!?????



      

老細送的禮物

真係估唔到, 返左就黎三個月工 (下個星期先過 probation), 老細前兩日臨放工親手送左份禮物賀我結婚! 嘩!!! 我當堂呆左, 好唔好意思收...  話晒做左無耐, 我又日日準時放工 (因為成日趕去派帖或者飛返屋企搞結婚野), 所以真係唔想佢破費!!!

依個老細仲好人到話:  送俾你等你同未來老公買自己鍾意既野! 唔好OT啦, 一世人一次, 準時放工係應該...............

我即刻話:  我都唔好意思日日準時走... hehee... 好多謝你 understand 呀!!!!!

* 真係慶幸搵到一個咁好既 boss!

* 亦都好開心返埋下星期二就放婚假啦... 依間公司仲送我七日婚假, 真係無言感激!!!



    

哭了

距離大日子越黎越近, 但心情就好似無咁緊張, 只係好似有少少麻木左咁…

上星期因為一件事, 令我竟然係待嫁既時候喊左出黎… 相信如果你係我, 被個識左十年既人誤會兼放飛機, 同我講我結婚果日唔會幫我影相啦, 唔知你會點呢???  

最近, 忙於 confirm seating plan, 因為要盡快回覆酒樓圍數, 為訂菜好好準備; 不過, 依D時候, 竟然令我睇到好多人既真面目 (相信我唔可以再當依D人係朋友)!

我既大婚日子, 如果係真心既朋友, 佢地會替我開心, 同我講祝賀既說話, 會問我有無野要幫手, 會同我講會早D到, 會問我準備成點; 結左婚既朋友, 會俾我更多意見, 提我什麼要留意, 叫我唔好緊張… 而唔係搵其他唔知乜既原因去避你, 推你… 或者我唔可以叫失望, 因為原來由頭到尾你當佢地係朋友, 佢地就無當你係囉!

亨利仲話, 佢有D朋友無被邀請, 都主動搵佢祝賀佢, 仲話想黎飲… 聽到真係好開心!!!

今日輪到自己大婚, 深深感受到搞一個婚禮原來真的不易; 最後, 最想既都係想各方好友黎同自己祝福, 同自己分享喜悅, 就係咁簡單!

我的花球

終於又搞掂一樣啦, 就係我個花球啦...

花多眼亂, 其實有好幾款我都好鍾意; 但最後我選左依一個款:

         

因為個老細 Trinice 話依款個顏色其實好 sharp, 同埋依款個頭花會有好多...  所以最後我都信佢, 要左依款啦...

我份(閒)工

 

唔經唔覺又返左差唔多兩個月長工...  雖然下個月先過 probation, 但感覺已經好似返左好耐...

每朝六點幾起身, 因為為左每朝每個 staff 都要出席既 morning briefing (@8:50am)…

大公司 ---  原來同政府部門都幾相似; 相似係 "人", 大部份既都做超過唔知幾多十幾廿年, 有D女同事, 做到嫁人, 生完仔再生仔, 都繼續做, 亦都可以話做到化晒…

依份工, 同我以前做的好幾份好唔同…  人多, 原來就真係會是非多, 你想融入佢地, 都真係一件頗難既事…

不過算啦, 依一刻工作已經唔係我既第一位; 我已經好努力盡量工作時投入工作, 但亦都會好盡量準時放工, 因為返到屋企又要忙第二樣野, 所以要爭取時間…

希望老細明白啦…  我同自己講, 過埋一月honeymoon 之後, 我會認真地投入工作架啦… (wahaaa, 希望到時唔會被人抄左啦…)

 

         

         * 買左兩個新盆栽, 希望可以轉下運, 減少是是非非, 吸晒D衰氣....

 

我同亨利的帖

自月頭過左大禮, 就不停係屋企做工廠女工咁入帖, 釘餅卡, 同印信封...

雖然忙, 但又好開心; 好開心咁打電話通知各界好友我終於嫁啦... 

好多謝有D細心既好朋友, 知道我開始忙, 寧願叫我寄帖俾佢地; 如果唔係日日要我出街食飯同派帖, 都唔知要派到幾時, hehehe...

P.S. 在此, 收到帖既朋友, 希望你地果日會早D到, 因為我地會準時八點半開席架啦!

通知左你但你又仲未收到帖既, 如你又唔介意, 麻煩盡快回覆我你個郵寄地址啦! 因為十二月頭我要 confirm 酒樓坐位啦, thank you very much and thanks for your understanding! 



      

 

兄弟姊妹Gathering

上個月前己約定, 11月22日, 即係尋日, 亦都係我同亨利既婚禮踏入一個月倒數, 約晒全部兄弟姊妹請佢地食飯兼作最後 briefing...

因為大家本身又忙, 我同亨利仲忙, 所以寧願黎個早少少既 gathering, 方便之後各自跟進...

雖然兄弟姊妹各自少左兩人出席, 但我地都好開心同有一個好 fruitful 既 "meeting"! 在此, 再一次多謝各位兄弟姊妹, 當日將辛苦大家, 為我同亨利既婚禮全力以赴, 做到最好!! hahahaa.....

P.S.  多謝你地叫我同亨利要好好享受果日既每個 moment...   真係好期待呀!!!


        

無奈

依排忙到不得了, 除左跟結婚野, 就係搬野去新居…

黑左咁耐既我, keep 住繼續黑…. 繼其中一個姊妹因健康問題幫唔到手之外; 最近又有一個姊妹因老公家有事, 有一大半可能不便參與喜事, 最後又要我好唔好意思地搵左第二個頂上…  真係唔知叫好彩定唔好彩…

上星期日去左個好友既婚宴, 好開心好感動; 本來可以 post D相出黎分享下, 點知張卡無啦啦死左… 真係好無奈!!!

前幾日去左同酒樓傾各項細節, 發覺佢地真係好 prof, 令我安心好多…  酒樓誇張到下個月只有五日個場係無婚宴咋, 可想而知有幾勁! 但佢地都好細心, 俾我同亨利係依五日內搵一晚俾一個鐘頭我地包左個場去試碟, 聽歌, 感受個效果; 嘩, 真係唔贊唔得呀!!!

不過好可惜, 我個好朋友攝影師, 到依家都未俾到個成長片段 video 我地, 連個demo 都未有呀!!!! 真係好唔開心, 前日仲差少少同佢係電話內開火… 係, 自問係一個緊張既人, 更何況係婚姻大事既事項呢??!! 依家距離我同亨利既大日子真係只有一個月, 開始忙依樣忙果樣; 到時佢整左, 我地都未必有時間即刻睇, 睇左又可能要改; 個陣時就更加無時間…. 唉… 究竟個個攝影師做得耐係咪都係咁既呢????? 



                       

我的簽名筆 - Part II

上兩個月前整左幾支簽名筆, 前幾日再一口氣整多幾支...

為左環保, 我用番之前做過姊妹帶既假花(黃玫瑰)做筆頭... 係咪好靚呢!!!

其他筆就用D新既小花整...

跟住包番絲帶就完成啦...

等我去買番兩個靚靚樽黎插住D筆, 到時放係 reception 俾人簽名先...

     

試妝 - Part II

唔開心左成個星期, 今日終於約左第二個化妝師到我家試妝…

依個化妝師果然唔同D, 睇佢既化妝用具同化妝品都好 prof.!!!

坐底之後清楚講出我既化妝要求, 頭髮都無乜講點 set就開始試妝…

今次就叫左一個姊妹同佢個朋友仔黎睇同俾下意見…

好開心, 今次個效果真係好唔同; 好底又打得好, 個妝好出, 好靚, 好鍾意…

試左兩個鐘就 confirm 一定要搵依個化妝師 (同cancel 之前果個), 不過, 依個新既當然係貴D啦…  但一諗起果日會拱靚, 真係乜都值得呀!!!!!!!!!!!!

P.S. 今次真係好好彩咁短時間都搵到佢, 而佢仲要推左之前個 job 黎接我依單, 真係好多謝 TONY既介紹呀!!!



          

極潤 (到爆)

 

之前睇過雜誌介紹, 話有支爽護 lotion 係日本每隔唔知幾多秒就賣出一支... 嘩, 咁神奇??!! 我梗係買支試下啦...

原來真係無講錯, 依支 "肌研" 既 <<極潤>> 真係好鬼潤同好保濕, 果然名不虛傳!!!

最近就黎用晒, 又去左買一支新... Only HK$88, 真係好抵用.

如果皮膚乾既朋友, 快D去買支試下啦...

 

          

 

 

過大禮

尋日過左大禮, 好開心呀!!! 亦都多謝天公造美...

我訓到十點, 跟住就係屋企做工廠女工咁入帖同 print 帖...

依個重要日子, 媽咪都邀請左姨媽黎我地屋企; 不過, 去屋企之前去左飲茶先...

過大禮既吉時係下晝三點, 所以我地飲完下午茶就坐的士返屋企等亨利同佢阿哥黎啦...

兩條友仔抽左勁多野黎仲抽到傻左, 仲要加埋著埋西裝黎, 真係加晒分啦...

不過, 佢地黎既時候, 我就閃左入房, 因為唔可以同亨利見面住...

當佢地“交收”完畢, 媽咪就叫我係房出黎啦...

最後媽咪就回番一個超大發餅同一D唔叫乜既糕俾番男家...



        

        * 姨媽 & 媽咪

試妝

尋日約左化妝師去我屋企試妝, 由下晝三點半試到成夜晚八點...

依個化妝師係之前我同亨利影過外景婚紗相時免費幫過我化妝時認識的; 所以今次我結婚, 都想搵番佢幫我化...

不過, 唔知點解今次試結婚妝就唔係太太太鍾意囉... 因為實在太濃 (好似有D娘) 啦!!!

此外, 以我所知家下都唔興假黏眼睫毛, 但我個化妝師都幫我試下效果 ---  嘩!!! 真係好唔自然呀, 同D eyeshadow 都唔係好得...

唉, 我真係由今日開始速成一下依家興乜野結婚化妝; 到時再叫佢幫我化..

不過, 好彩佢set既頭都好靚, 我都好滿意!!!

Remarks: Thank you 姊妹 Sally 陪左我成日同幫我影相呀!


      

我的結婚證書冊

終於收到我同亨利既結婚證書冊啦... 好鍾意呀!!!

因為之前見到有bloggers介紹, 覺得好靚... 所以我都去整番一個!

封面有我同亨利個名同結婚日期, 裡面左面可以放張8R相, 右面就可以放當日註冊既結婚證書冊啦...



       

 

滑雪手套

 

多謝亨利買左對好靚既滑雪手套俾我...

因為我地決定一月去北海道加東京honeymoon, 家下簡直未出發先興奮兼洗錢錢...

仲有我同亨利都比較怕凍, 所以要買定多D保暖野同雪褲呀...