因為 Larry 介紹, 我地去左銅鑼灣恩平道亨利中心9樓 "天扶良" 食晚飯...
個環境點解同 "壽司廣" 咁似既?? 再望下個 menu, 哦, 原來係同一個老細, "壽司廣" 就係十樓.
我地坐 table 枱無坐 counter, 因為方便傾計. 而我地都無散叫野食, 選左一個壽司 set 同一個天婦羅 set.
可能之前食過 "壽司廣", 所以今次既野食好似對我無乜太大既驚喜, 因為型式差不多一樣... 套餐包一杯小香檳+前菜+湯+主菜 (12件壽司 / 天婦羅)+沙律+烏冬+生果.
今次覺得D壽司好一般, 唔係好夠鮮味!! 不過, 天婦羅就值得讚, 因為炸得好正! 同理個日本既細細粒提子真係好好味!
Overall一般啦, 坐既環境都好有自成一各 feel, 因為有板間開晒, 都幾舒服; 不過, 價錢要成三百幾一個 set, 就好似貴左少少啦!!!
今日同亨利去左朗豪坊睇戲; 因為亨利今晚要返夜, 所以我地去左睇十一點鐘早場...
講真, 我咁大個人都好似未睇過早場; 不過, 真係估唔到原來都有咁多人黎睇架!!
亨利提議睇 "超(低)能特攻隊", 我之前完全都唔知係乜戲; 後黎上網睇先知原來又係果D《搞乜鬼奪命雜作》個類... Well, 笑下都好!!
點知, 真係笑到喊濕左兩張紙巾, 簡直頂佢唔順... 超好笑! 比我之前去睇個套爛片 "賤郎 300" 好睇過十萬倍呀; 因為佢低能得黎有劇情!!!
係屋企附近開左間叫 "糖痴豆" 既糖水店. 佢都開左好一排架啦, 不過, 行去兩次都見爆場無位, 最後唯有走人...
前排提早慶祝父親節, 食完飯之後, 亨利同我加細佬同 Elaine 一齊去食糖水; 今次好好彩有位呀!!!
店子細細, 但環境舒服; 而且都算多野食選擇! 傳統同新款既都有得食...
我同細佬都各人叫左個心太軟; 亨利同 Elaine 就分別叫左個楊枝金露涼粉西米露 & 什果涼粉西米露.
真係估唔到佢地個西米露咁大碗架, 但都係 25 蚊, 真係抵呀!!
至於賣飛佛既心太軟就一樣的好食, 好鬼鍾意流出果D朱古力既一刻...
P.S. 亨利, 你幾時學識整個心太軟俾我食呀???????
